സൂക്ഷിച്ചു കേറിവാടാ
ടെറസ്സ് വീടിന്റെ സൈഡിലുള്ള ഇടുങ്ങിയ കോവണിയിലൂടെ മണിച്ചേട്ടന്റെ പുറകെ ഞാൻ മുകളിലേക്ക് കയറി .
കയറുന്നിതിനിടയിൽ ആ ടെറസ്സ് വീട്ടിലെ സ്ത്രീ എന്നെ ചൂണ്ടി മണിച്ചേട്ടനോട് എന്തോ ചോദിക്കുന്നുണ്ടായിരുന്നു മണിച്ചേട്ടൻ മറുപടി പറഞ്ഞെങ്കിലും ഹിന്ദിയിലുള്ള ആ സംഭാക്ഷണം എനിക്കൊട്ടും തന്നെ മനസ്സിലായില്ല .
ഹിന്ദി എഴുതുവാനും വായിക്കുവാനും എനിക്കറിയാമെങ്കിലും സംസാരിക്കുവാനും , സംസാരത്തെ മനസ്സിലാക്കാനും ബുദ്ധിമുട്ടായിരുന്നു .
കുനിഞ്ഞു കൊണ്ടു ആ കുടിലിനുള്ളിലേക്ക് കയറിപ്പോയ മണിച്ചേട്ടന് അവിടെ കുനിയേണ്ടതായ ആവശ്യം ഒന്നും തന്നെയുണ്ടായിരുന്നില്ല എന്നുള്ളതായിരുന്നു ശരി കാരണം ചാടിക്കൊണ്ട് അകത്തേക്ക് കടന്നാലും മണിച്ചേട്ടന്റെ ഉയരം ആ വാതായനങ്ങൾക്ക് ഒരു പ്രശ്നമാവുകയില്ല എന്നിട്ടും മണിച്ചേട്ടൻ എന്തുകൊണ്ട് അവിടെ കുനിഞ്ഞു എന്നുള്ളത് ഉത്തരം കിട്ടാത്ത ഒരു സമസ്യയായി തന്നെയാണ് എനിക്ക് തോന്നിയത് .
എനിക്ക് ഉയരമുണ്ട് എന്ന് കാണിക്കുവാനുള്ള മനസ്സിന്റെ അപഹർഷതാ ബോധമാവാം അല്ലെങ്കിൽ അത് എന്നെ കാണിക്കുവാനുള്ള മിഥ്യാ സങ്കൽപ്പമാവാം എന്തു തന്നെ ആയാലും ആ കവാടം എനിക്കൊരു പ്രശ്നം തന്നെയായിരുന്നു .
ഞാൻ കുനിഞ്ഞില്ലെങ്കിൽ തീർച്ചയായും എന്റെ തല മുട്ടും .
അകത്തേക്കു പോയ മണിചെട്ടനെ പ്രതീക്ഷിച്ച് കൈയ്യിലുള്ള ബാഗും നെഞ്ചോട് ചേർത്ത് പിടിച്ച് ഞാൻ നിന്നു .